لانطيرنيت 2

ها واحد السلام عليكم
وا غبرة هادي آ با مهندس!!! ياكما...؟؟؟؟ خدمتي ؟؟؟ هه، حيد آ صاحبي ديك الفكرة من راسك واش نتا حمق ولا مالك!! ومالها ؟؟ دابا تشوف، المهم، را قتلونا غا بسطاجات و الخدمة ديال بيليكي حقا ما حقا الأزمة الإقتصاديةأثرات عليهم بزااااااف مساكن، مالقاو باش يخلصو عيباد الله، عندهوم غا باش يبنيو الفيلات ديالهوم و يديرو فيها الصونا، آآآيه آ سيدي الصوووووووووونا، كاليك غادير دار ديال المستقبل، ناري شحال قدي مانشكي و ما نحكي، الحاصول ماشي على هادشي جيت نهدر اليوم، عقلتو على المقالة ديال لانطيرنيت ؟؟؟ كنت عاودت ليكوم على المرة الأولى و المرة التانية اللي مشيت فيها لسيبير. آجي نعاودليكوم على المرة التالتة:
دوك جوج مشيات لسيبير اللي دازو، ردوني إنسان آآآآآآآآخر، وليت تانشوف الدنيا و الحياة و بنادم و كاع كولشي بشكل مختلف، وليت تانحس بأن التكنولوجيا دخلات ليا فالدم ديالي، وايلي آصاحبي واش أنا فحلم و لا فعلم؟؟؟ (عمركوم شتيو اللي تايضحك راسو براسو؟؟؟؟!!!)، المهم واحد تانهار كلت آرا نمشي تاني لصيبير(هه زوينة هاد الصيبير) نبحر شوية فبحلر العولمة، عالله يكون شي ولد الحومة تما باش يشوفني و ينشر الخبر.
دخلت، لقيت الصيبير عامر، شديت واحد الكرسي و كلست تانعاين. أشكال و ألوان دبنادم كاينين، ها الكبير ها الصغير ها اللي جاي و جار معا جوج، ها اللي جاية و دايرة فيها عايقة حيت كاتصنت للموسيقى بالكاسك. بان ليا واحد الدري مقنت لداخل،لبوسط اللي شاد ما مقادش بحالو بحال لخرين، مايل لعندو، وشاد الجنب ديال ليكرون بيدو لعسرية، حناكو ؤ ودنيه مزنكين كي مطيشة، وعينيه مبلكين فالشاشة تكول غادي يخرجو ليه، ضاهرة تايدير شي روشيرش على شي حاجة سخونة هي اللي دارت ليه الصهدة.
أخيرا خوا واحد البوسط، نضت من بلاصتي تانجري و كلست فيه، حتا من التيكيتة ماخديتهاش ديك الساعة، حيت أنا واعر ؤ قوالبي، شنو درت؟؟ حليت شي ربعة ديال ليباج، و درت فيهوم كوكل عاد نضت ناخد التيكيتة، باش حتا إلى جا شي واحد و لقا البوسط خاوي غايشوف بيلا را ليباج محلولين غايعيق بيلا راه عامر، ويلي ويلي التيكنولوجيا ومادارت فياااااا. ريحت معا راسي و بديت تانحاول نتفكر كيفاش جبدت الشاب خالد ديك المرة، مصيبة كحلة، مشالي كولشي ماعرفت منين نبدا عاوتاني، درت هاه و هاه عل و عسى يبان شي واحد يجي يعتقنا ساعة والو، ماتابان ليا غا واحد كان عاصر معا مول التيكيتات، كان تايوريه شي حاجة فلانطيرنيت، باينا فيه شي نزق هادا. سمرت عليه حتى سالا و نا نعيطلو، درت ليه واحد الدخلة ديبلوماسية باش مانتفرطرتش قدام بيبل، كلت ليه من البعد : خويا آجي الله يحفضك شوف ليا مال هاد البيصي، را ليباج ماتايبغيوش يتحلو ليا، ناري على ذكاء!!!حتى هو ماكانش من العاكزين، جا تايجري، الفرطة الكبيرة هي فاش لقا كولشي خدام، أنا عاوتاني دغية زربت عليه، لصقت ليه ديك اللعبة ديال راني مامولفش هاد الصيصطيم ههههههه، كال ليا أنا غادي نعلمك كيفاش تبدا تدخل ل لانطيرنيت و كيفاش تجبد داكشي اللي باغي منها، هاديك آ با مهنديس التكنولوجيا عاوتاني كاتعيط يتوووووووووووب. سولني واش عندك بعدا شي بواط ؟؟!!! بقيت حال فمي، أواه بواط كاملة زعما ؟؟!! لا أخويا أنا غا كانسمع بيها و عمرني حتى مامشيت ليها، اللا آصاحبي، ماشي الزدحة، مركت، بقا تايشرح ليا لا بواط، تسعود ؤ تسعين فالمية كانت هدرتو بالفرونسي، ماقشرت والو تقريبا، تقريبا هي والو فمرة، المهم، بقا تايهدر تايشرح وانا تانكول فنفسي يا ربي يصقل خلاص، ندمني لاش عيطت ليه كاع، مرة مرة كنت تانخطف عيني لديك لماكانة اللي فالقنت ديال الشاشة، كنت خايف لا يمشي يكيدني و ندير كتر من الوقت اللي جاي أنا على ودو، كملات الساعة الأولى، بدا كايتزايد معايا الزايد، شوية لقيت بلا زدت نص ساعة اخرى، آهيا واش هاد خينة غادي يتشارك معايا فالخلاص و لا مكره أخاك لا بطل ؟؟؟!!! قبل ماتوصل الساعة التانية كلت ليه: خويا سمحلي نوض بحالي حتى لغدا و نجي تاني. فلبلاصة ديال الخلاص لقيت داك خينة اللي تزنكو ليه الودنين حتى هو تايخلص، مسكين، ماكانش قادر يزيد و كاني غادي ؤ هو حاني، باينا داك الروشيرش ماكانش غا سخون، كان قاسح و كبير.....

الحاصول، دازت أيام و جات أيام، فالتالي عرفت بيلا لابواط هي الإيميل، زعما البراوات ديال فبور و بلا تنابر...ساعتكم سعيدة و غير بالقاعدة